ves esta página sin formato por que esta hecha cumpliendo el estándar web CSS 2.
tú navegador no soporta este estándar, o tienes dicho soporte desactivado.
si estas en el primer caso, actualízate. merece mucho la pena.
As capciosas preguntas de Ángeles Afuera ao futuro Alcalde coruñés fixéronme decatar de que, había onte dous anos, se producira en Elviña o intento de impedir a escavación, interrumpíndoa sine die coa que chamei "estratexia dos Controladores Aéreos". O certo é que o intento foi un fracaso e, tal día como hoxe (en realidade xa o mesmo 8 antes da hora de comer) a escavación estaba de novo en marcha.
O día 9 de xuño de 2009 tomei da miña man o Diario de escavacións, que ata entón estivera baixo a responsabilidade de Begoña González Afuera ata o 3 de xuño inclusive, e de María Rodríguez Rodríguez e Lucía Costa Súarez-Torga os días 4 e 5 de xuño. Bríndasenos, xa que logo, unha excelente oportunidade para que, quen así o desexe, poida ver o que pasou do outro lado da barreira, día a día, hai dous anos.
Transcribo, pois, o que di o Diario de escavacións do Castro de Elviña, escrito da miña man no 2009, tal día como hoxe:
----------------------------------
"O día 4-06-09 abandonan o diario sen previo aviso. Descúbroo o día 09-06-09. Hai quebranto e dano, por canto descoñécense os datos do realizado os días 4 e 5 de xuño. Tentarei recuperalo de fotos e debuxos. Retómase o día 09-06-2009.
[segue asinado autógrafo]
Día 9-06-2009
Os peóns non veñen polo mal tempo de onte (choivas fortes todo o día, imposible traballar, ademáis de que onte, sen avisar á Dirección Facultativa, as arqueólogas mandáronlles marchar nalgún momento da mañán. A ausencia de hoxe foi concertada onte pola tarde con C.C. da empresa adxudicataria, e non se factura.
Ás 9:00 o tempo é bo. Un novo fallo das previsións meteorolóxicas. É necesario porque as catas están convertidas en barro mollado imposible de escavar. Frío pero seco. É preciso deixalas secar antes de proceder á súa limpeza.
Actualizo fotos de UEs e pezas na base de dados. Reviso últimas siglas, e destaca_
- Na UE 14097 hai cerámicas finas de pasta laranxa, "de importación".
- Na UE 14053 hai un fragmento de pizarra con morteiro adherido.
- Na 14170, un frag. gris oscuro a torno con retícula bruñida en rombos.
- Na 14096, cerámicas laranxas e grises.
- Na 14170, un fondo con pé anular, laranxa.
- Na 14170, un borde gris grande.
Ordeno as fichas, e coloco o paquete da última revisión miña nos seus lugares. Levaban sen ordenarse dende o día 3 cando menos, co traballo interrumpido.
Comezo co intento de aclarar a situación dos debuxos:
[sigue relación dos debuxos que reviso]
Completo fichas cun dato fundamental que deixaran sen cubrir: a data de remate de escavación de UE. Tal como o deixaron, non hai forma de saber qué foi escavado e qué non foi, e por ende resulta imposible seguir a marcha da escavación. Sigo sen entender o porqué diso, e non espero xa entendelo.
Están finalizadas, xa escavadas (pásase á ficha e á base de datos):
[sigue relación de 32 UEs nas que faltaba o dato na ficha]
[seguen dúas follas con listados de revisión de debuxos]
Ao mediodía comeza a orballar, e vai collendo intensidade pola tarde. Foi imposible practicar coas estacións totais.
Mentres Mercedes e Laura continúan a lavar e fotografar rexistros e siglas, eu sigo revisando fichas e debuxos. Seguen a saír un montón de fallas e erros, como sempre, incluso moitos dos tres últimos días.
Pouco a pouco a cousa mellora e xa conseguín facer unha pequena lista de UEs para escavar.
Chamo á empresa adxudicataria para falar da conveniencia de enviar ou non mañá aos peóns. Coa choiva de agora mesmo é imposible traballar, e ainda que pare, os solos etarán mañá encharcados e sen posibilidades de traballar. C.C. concorda en que con este tempo mellor non intentalo. Quedamos en que decidirá él mañá pola mañán, según estea o tempo a primeira hora. Se chove ou amenaza choiva, os envía a outras obras.
Pola tarde debuxo en vectorial as UEs das que se tomaron puntos o 04-06-09 na estación Nikon, a saber:
[segue lista de UEs que se debuxan]
O resultado do día é bo para a escavación, pero demoledor para a moral: 28 fichas con erros sustanciais e/ou ausencia de datos importantes.
É certo que con traballo pódense corrixir os erros e encher os datos que faltan, pero ¡a qué precio! É realmente inhumán.
Xa na casa proceso as fotos de hoxe (materiais) e as coloco por carpetas e na base de datos.
O máis chamativo é un fragmento de vidro verde claro, rematado en moldura en tubo (1703), e un anaco de colo de posible botella de verniz vermello (1700). O restante, ademáis das eternas e torturantes tegulae e pizarras, algún fondo gris, cerámicas grises claras e laranxas.
Ás 21:00 chamo a Begoña, María e Lucía. Só responde María, que parece ir mellor. Axúdame coas UEs do "desnivel", que controlaba ela, e queda tranquila según di cando lle conto que non hai traballo cos obreiros.
[seguen dúas páxinas de comentarios e anotacións técnicas, e relacións de debuxos que se fan]
Paro de debuxar ao comezar a ter dificultades de visión, ante o risco de cometer erros. Son as 23:18 horas. Non me queixo: levo sen parar desde as 8:50, e xa antes traballara na casa desde as 7:30. Van case 16 horas de traballo. Realmente é inhumán, pero como levo así moito tempo xa estou afeito. O realmente inhumán é que gasto todo ese tempo en correxir erros e buscar datos que tiñan que estar nas fichas pero non están. A sensación de impotencia, de que a vida váiseme coma serrín entre os dedos, é forte e deprimente. Este esforzo, aplicado ao que tiña que ser, tería dado froitos. Así non é posible. ¡Fóra, depresión! Non teño tempo para deprimirme. Xa me pillarás cando me retire. Ten paciencia.
Cambio de tercio a ver se se distrae. Repenso unha vez máis a CLP (Cata Longa Plataforma). A terra que dobla no extremo SW do "pasillo" non pode ser 14099. Ten que ser 14069. Hai que probar, e cambiar todas as relacións, estudando as fotos. Agora non podo. Entrambas hai, en vertical, unha capa de cascotes á que hai que dar número. Mañán, que non teño aquí a lista. A secuencia será 14050=14063>14069>nova de cascotes>14099. Así a cousa queda máis sensata.
[segue unha folla de comentarios técnicos similares]
Non podo máis. Son as 12. Remato. Son máis de 16 horas de traballo sen parar nin a tomar un café. Dúas xornadas laborais nunha. ¡Xa está ben!"
----------------------------------
¿Trabállouse ou non se traballou en Elviña, Ángeles Afuera? No país irmán un sabio cantaba:
E assim se faz Portugal,
uns vão bem e outros mal
Pois en Elviña, o mesmo. ¿Traballouse, trabállase en Elviña? Uns sí, outros non. Uns ben, outros mal.
O que é certo, indudablemente certo, é o que tamén dicía o mesmo sabio na mesma copla:
Faz lá como tu quiseres
folha seca cai ao chão
Eu não quero o que tu queres,
que eu sou doutra condição.
*************************
